لأنك ببساطه تستحقي
بقول لابني كمل أكلك يا حبيبي و خلصه كله مش انت اللي طلبته ..اتفاجئت انه بيقول لي لا مش عايز ، كمليه انت زي كل مرة !!!!
في استشارة أخرى :
بنتي أنانية أوي ...
ليه بتقولي كده ؟؟؟!!!
لأني كنت نازله اشتري حاجات لينا و لما جينا نشتري بلوزة ليا ... و كانت اختارت اللي هي عايزة ... و في المحل عجبها حاجات تانيه ... لما قولت لها انت جبتي اللي عايزه و انا هشتري البلوزة دي ليا لاني مش معايا فلوس تكفي حاجة تانيه ليكي .... قالت لي خلاص هاتي حاجتي و خللي البلوزة مرة تانية !!!!!! للدرجة بتحب نفسها .. مع أني بفضلهم عني دايما
هنا الطفل ده هنقول عليه ايه ؟؟ اناني و مش بيقدر مامته
🤔🤔طب المشكلة فين ؟؟؟
المشكلة هنا بدأتها الأم نفسها ... بتصرف طبيعي منها و هو تفضيل أبنائها عليها و جعلهم في المرتبة الأولى... مع الوقت الطفل بيتعود على تصرفااات الام و أن ده الشيء الطبيعي
و يبدأ يفضل احتياجاته على احتياجاتها هي .. و كمان بيوصل في بعض الحالات أنه بيعتبره حق مكتسب له ( أن يكون له الأولوية )، فبيكون كمان صعب تنازله عن الحق ده
طب و الحل ؟؟؟
ببساطه أن الأم متنساش نفسها و يكون لاحتياجتها أولوية هي كمان ... هي انسانة و فرد من أفراد الأسرة دي، لها احتياجات و من حقها تعمل اللي يبسطها هي كمان ...
و هي تستحق ده فعلااا لانها بتتعب كتييير
من حقك يكون لك وقتك ...
يكون لك راحة عشان تقدري تواصلي ...
أولادك لازم يتعودوا يأكلوا على أد احتياجاتهم خلصوا يأخدوا تاني ... لكن ميملوش الطبق اعتماداً على أن ماما مبترميش حاجة و هتكمل أكلنا
نازلين تشتروا حاجات ليكم، كل واحد ليه حاجة يختارها
او أكتر حسب الاتفاق المسبق
بالطريقة اللي متجيش عليكِ أنت او اي حد من أفراد الأسرة
متأكليش في طبق مشروووخ استخساراً في أنك ترميه
و عندك غيره سليم ( طلعوا من حاجات النيش
😊 الضيوف مش أفضل منك )الطفل مع الوقت بيشوف أن تصرفاتك دي عادية ...
و بيستغربك بعد كده لما ترفضي اللي أنت عوديته عليه
أنتِ ببساطة تستحقي
❤❤❤فكري في نفسك و متخلهاش تتوه منك وسط الحياة
و مشاغلها و مشاكلها
و اهدي نفسك هدية حتى و ان كانت بسيطة على انجازاتك اللي بتحققيها
فأنت أم رائعة و تستحقي
❤❤دمتم طيبين
شيماء الجميل
#لأنك_ببساطة_تستحقي
#لوني_حياة_طفلك
تعليقات
إرسال تعليق