سؤال عن ال baby و تكوينه

أنا و نوسي

امبارح لقيت بنوتي ربنا يبارك فيها و يحفظها يا رب جايه تسألني 😊😊😊
ماما هو مين اللي بيطلع البيبي ( Baby) من بطنك ؟!
الدكتورة أو الدكتور حبيبتي...
اممممم 🤔 طب هو بيطلع ليه يا ماما ؟!
لانه بيكون كبر و نموه بيكون اكتمل خلاص ( المخ و العين و القلب و الرئة و......)
فبيكون خلاص ملوش مكان جوه في بطن مامته تاني
و الدكتور لما بيكشف على البيبي و يشوفه بجهاز عنده بيعرف اذا اكتمل و لا لسه 😊
نوسي : ماشي
و شويه و رجعت تاني
مامااااااا
نعم
هو البيبي بيكون جوه بطن الباباهااااات كمان ( الآباء تقصد )
لا حبيبتي
امممم ليه ؟!
عشان ربنا خلق المكان اللي بيكبر فيه البيبي جوة بطن و جسم الام اللي اسمه الرحم
و ربنا جعل جسمها يستحمل ده
لكن الاب بطنه مفهاش رحم
اممم ايه ده الرحم ده يا ماما ؟!!!
ده المكان اللي بيكون مجهز عشان البيبي يقعد فيه لحد ما يكبر زي الاوضة و لما بيكبر بيخبط عشان يطلع
و الدكتور هو اللي بيساعد الام عشان يطلع للدنيا
بعد ما يكون كبر عشان يقدر يعيش في الجو ده
نوسي عامله كده 🤔 هااااااا ماشي
قولت لها و هجيب لك فيديو تشوفي البيبي بيكبر ازاي 😊
و سكتت و مشيت
انهاردة شغلت لها فيديو عن تكوين الجنين اختارت واحد يكون مناسب ليها و فرجتها عليه
و هذا الرابط الخاص به:
https://youtu.be/6CVlp-1RC_I
شغلت الفيديو و بدأت أشرح لها اللي بيحصل في الفيديو ( ده الحبل السري و من خلاله بيوصل الاكل للبيبي ، ده المخ ، ده القلب و هكذا.... )
و ان شاء الله هجيب الآيات اللي بتتكلم عن خلق الانسان و نتكلم عنها
😊
بعض النصائح اللي حسيتها مع السؤال.....
ناس كتيييير للاسف بتقف و ترتبك مع اول سؤال من طفلها له علاقة بالثقافة الجنسية حتى و ان كان بسيط...
يصيبها الاحراج و التوتر و التهرب من الاجابة

أهم حاجة نعملها عشان نكون جاهزين :
1. القراءة الكثيرة في الموضوع عشان نكون مستعدين عند السؤال
2. أخذ موضوع السؤال ببساطة و هدوء بدون احراج و اعتباره سؤال عادي، لان الطفل بيحس باحراجنا و عندها يستفز أكتر لمعرفة الاجابة التي يحاول الاهل اخفائها.
3. اذا لم تكن لدينا الاجابة الصحيحة ببساطة يكون الرد ( احتاج القراءة في الموضوع لأعطيك الاجابة الصحيحة ) و نرجع للطفل و نفتح الموضوع قبل رجوعه مرة اخرى بالسؤال....
و هنا الطفل هيتعلم أنه عادي ألا اكون مُلمه بكل المواضيع و علينا البحث في المصادر الموثوقة لمعرفة المعلومة الصحيحة.
4. شرح المعلومة بطريقة تناسب سن الطفل، و البعد نهائيا عن الكذب او تشويه المعلومة لكي لا نفقد ثقة الطفل بنا و يبدأ بالبحث عن المعلومه من مصادر خارجية أخرى ...
5. هذه الأسئلة ممكن تكون مع الأطفال من سن 4 الي 6 سنوات و بيكون حسب قدرة الطفل و استيعابه و حسب الأم و شغلها مع طفلها و المعلومات اللي بتوصلها له و البيئة المحيطة بيه، و كمان اذا الأم حامل ممكن الأسئلة تبدأ من سن أقل من 4 سنوات.
دمتم طيبين
شيماء الجميل
#لوني_حياة_طفلك