بسبوسة ستايل ـ و طريقة البسبوسة :)

بسبوسة ستايل :) 

 جربت طريقة جديدة من فترة طلعت جميييلة

و لأني من محبي البسبوسة و جربت لها طرق كتيييير عشان تضبط معايا و كل مرة كانت بتطلع بنتيجة غيراللي قبلها

البسبوسة اتعلمت منها على رأي شيمو انها اسلوب حياة 😆
ازاي بقى؟

حياتنا فيها تجارب كتيييير و حاجات كتييير نفسنا نحققها و ننجح فيها
و فيه بعض الاحلام اللي بيشاركك فيها ناس تانية زيك بردة نفسهم ينجحوا في نفس الحلم

و اذا فكرنا في التربية كمان زي ما بنفكر في طرق عمل الأكلات اللي بنحبها و نرجع نجرب فيها كذا مرة بصبر و ده لأننا بنحب الأكلة دي
فالتربية كذلك
تحتاج منا الصبر و التكرار للوصول إلي هدفنا و هو تربية طفل سوي يقدر يعمر الأرض

الحلم واحد عند الجميع و هو التربية السليمة

اهم حاجة في الموضوع انك متقفيش عند تجربة او اتنين نحو تحقيق حلمك في تربية أطفالك
لا استمري و كملي و اتعلمي و اصبري .. اصبري .. اصبري ....

طفلي عنيد دوري و اقرأي كتير عن العند و أسبابة و ازاي تتعاملي مع الطفل العنيد و سمات المرحلة ... و مهم جداً تصبري عند تطبيق اللي قرأتيه لأنه بياخد وقت بيختلف من طفل للتاني.

و نقطة مهم كمان ينفع تحطي مكونات البسبوسة كلها مضبوطة و تيجي عند التسوية تعلي الفرن ... طبعا هتبوظ منك
التربية كده كتييير يقولوا عملنا كتيييير من اللي بتقولوه و مشينا بالضبط.. بس تيجي تدوري هتلاقيهم ماشين مضبوط بس بيضربوا مثلا فبيبوظوا كل اللي عملوه

تاني حاجة مهمة جدا نركز كويس التربية فيها مدارس عديدة و الناس اللي دارسة تربية و بتكتب فيها كتييير، مهم جدا تركزي مع حد متوافق مع هدفك و يتبع المدرسة اللي نفسك تربي طفلك من خلالها
ممكن تتابعي كذا حد مش مشكلة بس يكونوا نفس الفكر ... لأن اللي بيحصل حالياً أن فيه أمهات متابعة العديد و بتاخد من هنا كلمة على هنا كلمة و تيجي عند التطبيق ميكونش فيه نتيجة عشان هي مش مركزة

ورقة و قلم و ركزي في أهدافك و اكتبيها و شوفي مين بترتاحي له و اقرأي له مع طبعاً قراءة الكتب اللي بتفرق كتير

و أخيراً

طريقة البسبوسة

قبل ما أوضح طريقة البسبوسة ... طبعا نشارك أطفالنا في مساعدتنا في عملها
مهم نسمي لهم أسماء المكونات
نخليهم يضعوا معنا المكونات
يزينوا بالبسبوسة بالمكسرات

المكونات:

1 كوب كريمة لباني
نصف كوب زبدة سايحة
نص كوب سكر 
كوب جوز هند
2 ملعقة صغيرة دقيق مخلوط بملعقة صغيرة بيكنج بودر
1 و نصف كوب دقيق سميد ( سامولينا )

للشربات:
كوب و نص سكر مع 2 كوب ماء و عصرة ليمون

الطريقة:

نقوم باضافة كل المكونات السابقة ماعدا السميد و نمزجها جيداً و بعد تمام الخلط
نضيف السميد و نقلب برفق حتى يمتزج الخلط فقط .. تقلبتين

نزينها بالمكسرات و نقطعها و نتركها ترتاح 10 دقائق

تسخن الفرن بين 200 ل 220 درجة ( قبلها بربع ساعة) و بعد 10 دقائق نخرجها و نعيد تقطيعها مرة أخرى

و في هذه الأثناء نضع الشربات على النار و يوضع ساخن على البسبوسة فور خروجها.

بعدها ندخل البسبوسة في الفرن المطفي 5 دقايق عشان تشرب الشربات كويس و تكون طرية و نخرجها.

و بالهنا و الشفا

الطريقة الأصلية :

دمتم طيبين
شيماء الجميل

لمتابعة الصفحة: لوني حياة طفلك
و متنسوش الاشتراك في المدونة ليصلكم كل جديد