أمي نبع الحنان

حبيبت أشارك معاكم أول حاجة أكتبها بعد ما بدأت امشي في طريق شغفي
و كانت طبعا أول كتاباتي عند الغالية دعاء صفوت في صفحتها و عن أغلى الناس 😍
...........................

أمي
السلام عليكم و رحمة الله و بركاته
أول حاجة ليا اكتبها و تتنشر عليها اسمي انهارده :) بشكر دعاء انها اديتني الفرصة دي الحمد لله
لما سألتها تنصحيني أول حاجة ليا تكون فيها ايه ؟؟ قالت لي اكتبي حاجة من روحك
مقليتش الصراحة حاجة تمس روحي زي أمي فقررت أن اول كتابة ليا تنشر تكون عن أمي و عن الأم
ميلادي كان من خلالك يا أمي عشان كده قررت ميلادي انهارده برضة يكون ليه علاقة بيكي يا أغلى و أعز الناس
أمي اللي استحملت عشانا كتييييييير و جت على نفسها برضة كتييير
في فيديو التضحية بتاع دعاء اتكلمت اننا كأمهات لازم يكون ولادنا جزء من حياتنا مش كل حياتنا عشان هيجي الوقت اللي كل واحد منهم يكون له حياته و هتكون هي جزء منها مش كلها برضه
بس لما اتكلم عن أمي أقدر أقول أننا احنا حياتها مكناش جزء منها هي عايشة لينا و بينا
أمي ربنا يحفظها ربتنا بفطرتها السليمة سبحان الله ، و أنا اللي مع كل وقت بتعلم جديد في التربية الاقيها كانت بتعمل كده معانا من غير كتب
أمي استحملت كتيييير و جت على نفسها كتيييير عشانا
أمي اللي بشوفها معايا حتى و هي بعيد عني، في يوم أكون تعبانه فيه في التربية ، في يوم أكون مريضة و عليا حاجات كتييير أخلصها، في ضحكة ولادي ربنا يحفظهم ، في تعبهم و أنا قاعدة جنبهم مش عارفه أنام من قلقي عليهم.
أمي ببساطه أنت نبع الحنان، أنت أحلى و أجمل حاجة في الدنيا.
و سامحيني عن أي تقصير يكون صدر مني فهو أكيد بدون قصد مني.
و يا رب أقدر أخليكي فخورة بيا دايما يا حبيبت قلبي يا اللي حبك ساكن كل حته فيا.
و عايزة اقول حاجة ربنا جعل أمي ليها فضل كبيييير عليا في حاجات كتيييير و زي ما استاذة ايناس فوزي بتذكر والدها و دوره في حياتها، أنا أمي ليها دور كبييير في حياتي و هفضل طول عمري افتكرها بالخير و الحب و يا رب اجعل أي حاجة أوصل لها في حياتي يكون لها نصيب من الحسنات فيها ...

ورسالتي لكل أم ابعدي عن أي حاجة تسبب ألم لاولادك، خليكي دايما ذكرى حلوه عندهم، لما يفتكروكي يفتكروا لحظاتهم الحلوه معاكي ، مش يفتكروا زعيقك و ضربك ليهم،
خليهم يفتكروا حنانك و حبك ليهم......
مفيش لا مذاكرة و لا امتحانات و لا ضغوط الحياة و لا غيره تستحق منك انك تفقدي حب ولادك ليكي بسببها.....
و كل واحدة تقول لنفسها أنا أم ناجحة ، ربنا اداني نعمة كبييرة لازم احافظ عليها
يا رب أعني على تربية أبنائي كما تحب و ترضى
فالأم بها تبنى الأمم و بها أيضاً تهدم
و البوست أو الرسالة دي دعوة للدعاء لأمي و أمهات المسلمين يا رب احفظهم و بارك فيهن
و ارحم الاموات منهن
و بارك لكل أم في اولادها و احفظهم و أعنها على التربية الحسنة
و أكرم كل واحده نفسها في طفل يا رب
آمين آمين آمين
أحبكم في الله
شيماء الجميل
#أمي_حياتي
#أحبك_في_الله_يا_دعاء
#حياتنا_وولادنا
#لوني_حياة_طفلك

الموضوع تم نشره مسبقا في صفحة حياتنا و ولادنا مع المساشارة الأسرية دعاء صفوت من خلال الرابط التالي:
https://m.facebook.com/DOAASAFWAT4/photos/a.660853070700709.1073741827.639688816150468/1063795557073123/?type=3&source=54